Hamdi Salihi do të jetë pjesë e kombëtares shqiptare. Pas një mungese të gjatë, bomberi shkodran rikthehet tek kuqezinjtë. Natyrisht nuk do të ndodhë për të luajtur në fushën e lojës, pasi ai e ka lënë futbollin, por do të jetë pjesë e stafit teknik me në krye trajnerin e ri, Edi Reja.
Sipas ballkanweb, Hamdi Salihi ka zhvilluar një takim me teknikun italian menjëherë pas prezantimit të tij zyrtar në pankinën kuqezi, ndërsa edhe gjatë paradites të së enjtes, të dy ata janë parë bashkë. Por, nuk dihet ende cili do të jetë roli i ish-sulmuesit në stafin teknik të përfaqësueses.
Me shumë mundësi, Salihi mund të zërë rolin e Erjon Bogdanit, me përgatitjen e sulmuesve, një rol të cilin Bogdani e ka kryer në kohën kur kombëtarja drejtohej nga Xhani De Biazi. Në sezonin e tij të fundit si lojtar, Salihi ishte pjesë e ekipit të Nojshtad në ligën e dytë austriake.
