55-vjeçari, Shaban Shehu kishte vendosur këtë të hënë të shembte një banesë të vjetër pas asaj që kishte ndërtuar të re në fshatin Qerret të Durrësit.
Për ta ndihmuar kishte pajtuar edhe një 27-vjeçar. Por në një moment, tarraca është shembur duke i zënë poshtë që të dy.
“Kanë qenë duke shembur atë shtëpinë e vjetër dhe i ka rënë tarraca poshtë.”
“Ishin duke prishur, shkatërruar shtëpinë e vjetër dhe i ka zënë”, shprehen banorët e zonës.
Në vendin e ngjarjes mbërritën policia, forcat e zjarrfikëses dhe ambulanca pas alarmit të dhënë nga familjarët.
Atyre u është dashur rreth 40 minuta për të nxjerrë të dy personat nga rrënojat.
Për fat të keq, 55-vjeçari kishte marrë plagë të rënda dhe nuk mundi të shpëtojë. Ndërsa punëtori 27-vjeçar ka plagë më të lehta dhe ndodhet në spital nën kujdesin e mjekëve.
