Përballja në fushë mes vëllezërve gjithmonë është e sikletshme, por mes vëllezërve Ajeti ka shkuar më keq se duhet. Arlindi dhe Albian Ajeti, luajnë në pozicione të ndryshme në fushë dhe gjatë 90’ minutave duhet të mbulojnë njëri-tjetrin, për të demonstruar atë që dinë të bëjnë më mirë, të luajnë futboll.
Në përballjen mes Grashopers-Basel, përballja mes tyre ka përfunduar me një dëmtim që e lë Arlindin 2 muaj jashtë fushave dhe ai që e dëmtoi ishte Albiani. Arlind Ajeti nuk do të mund të luajë futboll për pjesën e mbetur të vitit 2018, pasi u dëmtua nga vëllai i tij, Albiani. Pas një përplasjeje midis tyre, mbrojtësi i Shqipërisë pati dhimbje dhe shtrëngoi shpatullën duke kërkuar ndihmën mjekësore.
Ai u rifut në lojë, por e pati të vështirë që të luante në përfundim të pjesës së parë, si pasojë e dhimbjeve të shumta. Kështu, stafi vendosi që ai të mos vazhdonte. “Kjo është një situatë mjaft e sikletshme dhe më vjen shumë keq për vëllanë tim. Nuk është aspak e bukur që të nxjerrësh shpatullën.
Unë uroj që të kthehet sa më shpejt. Nëse është e shkruar, ne do të takohemi përsëri 20 herë, dy herë apo asnjëherë. Por, kur të ndodhë, më mirë të evitojmë pak më shumë njëri-tjetrin”, tha Albiani. Mjekët rekomanduan ndërhyrje kirurgjikale për Arlind Ajetin dhe nëse kjo ndodh, mbrojtësit kuqezi do t’i duhen dy muaj rikuperim dhe praktikisht do të kthehet në fushë vitin tjetër.
