Një djalë nga Kosova, ka në sy një shenjë identifikuese, të ngjashme me hartën e Kosovës. Bëhet fjalë për 13-vjeçarin Besian Blenishti, nga qyteti i Ferizajit.
Ai ka në sy një hijezim që duket si harta e Kosovës. Madje, gjyshi i tij Musli Llabjani rrëfen për FaktePlus se ndihet i lumtur që djali i vajzës së tij e ka këtë shenjë në sy.
“Kur e kemi parë për herë të parë, na është duk diçka shumë interesante. Nuk dinim as ta përshkruanim. U tregonim njerëzve, por nuk na besonin”, thotë gjyshi i Besianit.
Ai tutje ka treguar se si spontanisht shokët e Besianit e kishin zbuluar këtë shenjë në syrin e tij.
“Ne nuk e kemi ditë por Besiani duke luajtur me shokë e kanë zbuluar rastësisht. Ata kanë qenë duke luajtur lojën si mjek edhe me dritë e kanë shikuar në syrin e Besianit edhe e kanë pa një shenjë interesante. Na kanë njoftuar edhe neve pastaj e kemi parë që ajo shenjë ishte harta e Kosovës”, thotë Musliu.
Ndonëse Besiani e ka këtë shenjë në sy, gjyshi i tij Musliu thotë se ai nuk ka probleme në shikim, madje ai thotë se harta e Kosovës në syrin e nipit është aq origjinale sa që duket si e qëndisur.
“Është aq origjinale sa që mendon njeri që harta është e qëndisur në syrin e tij. Edhe miqtë tanë janë befasuar me këtë shenjë të nipit. Ai nuk ka probleme në shikim, por që e ka një shenjë interesante”, rrëfen Musliu.
Besiani jeton prej vitesh bashkë me familjen e tij në Gjermani.
