Kombëtarja shqiptare nën drejtimin e trajneri italian, Christian Panucci dështoi të bënte paraqitje të mira në miqësoret e luajtura muajt e fundit. Eksperimentet e trajnerit italian me lojtarë të rinj nuk dhanë rezultate të mira dhe kjo ngriti pikëpyetje të mëdha në aftësitë e tij, duke vërshuar në një lum kritikash.
Një ndër personalitetet shqiptare që përdori gjuhë të ashpër në drejtim të italianit ishte ish-presidenti, Bujar Nishani. Ai e quajti Panuccin sharlatan pas humbjes me Kosovën dhe e akuzoi se po shkatërronte atë që ishte ndërtuar. Ndërsa tani mësohet se trajneri italian ka paditur në gjyq ish-presidentin e republikës së Shqipërisë, Bujar Nishanin, për fyerje dhe cenim të imazhit.
Nishani menjëherë pas humbjes me Kosovën shkruante në Facebook: “Kosovë – Shqipëri (3 : 0). Bravo Kosova! Panuçi një sharlatan që po shkatërron dhe atë që ishte ndërtuar.” Këtë nuk e ka kapërditë dot trajneri i Kombëtares së Shqipërisë dhe i është drejtuar gjykatës.
