Presidenti turk Tayyip Erdogan, ka paditur zëvendëspresidentin e Bundestagut Wolfgang Kubicki pas deklaratave të këtij të fundit, ku e quajti Erdogan, “mi kanalesh”.
Presidenti i Turqisë ngriti një padi kundër Wolfgang Kubicki për fyerje dhe shpifje, përmes avokatit të tij në Këln.
Kubicki, lideri i Liberalëve (FDP), gjatë fjalimit të tij të fushatës në Saksoninë e Poshtme të dielën e kaluar e quajti presidentin turk “miu i vogël i kanalizimeve” dhe e akuzoi atë për përdorimin e çështjes së refugjatëve si një mjet për të ushtruar presion politik mbi Evropën.
Më pas, politikani gjerman u përpoq të korrigjohej, duke folur për “një qenie të vogël, të lezetshme, të zgjuar dhe dinake”, por duket se nuk e ka bindur palën tjetër, pasi ambasadori gjerman në Ankara u thirr në Ministrinë e Jashtme Turke për të dhënë shpjegime.
Në padinë e tij, avokati i Tajip Erdogan, Mustafa Kaplan, thekson, sipas revistës Der Spiegel, se termi “miu i kanalizimeve” i referohet një personi që konsiderohet moralisht inferior dhe i neveritshëm” dhe argumenton se këtu nuk bëhet fjalë për kritika aktuale, por për shpifje.
Ai thirret edhe në arsye fetare, të cilat e bëjnë shumë të vështirë pranimin e kësaj fraze. “Islami i refuzon ofendimet e tilla”, shkruan z. Kaplan dhe shton se komentet e z. Kubicki nuk kishin të bënin me politikën e refugjatëve, ndërsa është, argumenton ai, “e pavërtetë që presidenti turk po i përdor refugjatët si një mjet presioni”. Avokati me origjinë turke nga Këlni thekson gjithashtu se Wolfgang Kubicki është vetë avokat, dhe nuk mund të deklarojë injorancë për atë që përbën shpifje.
Burimi i lajmit: Protothema. Përshtatur nga Tirana Today
