Dalin detaje të reja lidhur me vrasjen e komisar Artan Cuku, që tronditi mbrëmjen e djeshme kryeqytetin.
Artan Cuku, ish-drejtues i Policisë së Vlorës, u ekzekutua mbrëmë pranë banesës së tij teksa u qëllua me armë zjarri nga persona të paidentifikuar.
Krimi u krye rreth orës 20:00, gati 150 metra larg digës së Liqenit Artificial, ndërsa plagët i shkaktuan vdekjen e menjëhershme.
Sipas burimeve policore, 42-vjeçari është qëlluar nga dy persona, të cilët dyshohet se janë larguar nga vendngjarja me një motor.
Autorët i kanë zënë pritë Cukut në hyrje të pallatit, njëri qëndronte jashtë ndërtesës, ndërsa tjetri brenda.
Mësohet se vetëm njëri prej tyre ka qëlluar me armë mbi Cukun, konkretisht ka qëlluar 5 herë: 4 herë në gjoks dhe 1 herë në kokë. Autorët e krimit kanë shfrytëzuar rrugicat ndërmjet pallateve pa u vënë re, ndonëse pallati i viktimës ndodhet në një nga zonat më të populluara të kryeqytetit.
Cuku ka qenë i ulur në një nga lokalet e zonës para vrasjes, ndërsa dyshimet e para në lidhje me motivin e ngjarjes janë ato të vrasjes për shkak të detyrës së tij si ish-punonjës policie. Autorët i kanë studiuar lëvizjet e viktimës para ngjarjes dhe vendin ku do të kryenin goditjen. Ndërsa ndriçimi jo i plotë i rrugicës dhe fakti që zona është në ndërtim, duket se ka qenë në favor të autorëve.
Këta të fundit dyshohet se janë larguar nga vendi i ngjarjes duke përdorur rrugicat që bashkojnë zonën me sheshin “Willson”.
