Ditën e sotme zhvillohen dy supersfidat e javës së 20 të kategorisë Superiore dhe tifozët sërish nuk kanë preferuar që të zbarkojnë në stadium. Në ndeshjen Partizani-Kukësi, tifozët e Partizanit kishin njoftuar se do të jenë të pranishëm në stadium nëse nuk do të kërkohen kartat. Vendimi i fundit i Policisë, që kërkon karta identiteti ka bërë që “Ultras Guerrils” të ndryshojnë mendim.
As tifozët e Kukësit, nuk janë në numër të shumtë në stadium, duke parë edhe kushtet atmosferike. Një numër i vogël i tifozëve që jetojnë në Tiranë do të jenë të pranishëm.
Në ndeshjen që luhet për mbijetesë mes Vllaznisë dhe Teutës nuk ka tifozë të pranishëm në stadium. Shkodranët duket se nuk janë të kënaqur me rezultatet e ekipit deri në këtë pikë, dhe kanë vendosur të bojkotojnë. Ndikim kanë pasur edhe reshjet e shumta të shiut që po bien në qytetin e Shkodrës.
Tifozët e Teutës, ashtu si nëpër shumë transferta të tjera, as në Shkodër nuk do të jenë prezentë, duke e lënë ekipin e tyre të vetëm në ndeshjen, ndoshta më të rëndësishmen e sezonit.
