Një politikan milioner në Lindjen e Largët të Rusisë ka pranuar se ka vrarë një njeri, për të cilin ai thotë se e ngatërroi me një ari ngjyrë kafe. Igor Redkin, 55-vjeç, tha në një deklaratë për mediat ruse se kishte dëgjuar një ari në vendgrumbullimin e plehrave në fshatin Ozernovsky në Kamchatka.
Duke dashur ta trembë kafshën, ai ka shtënë me armë, e ndërsa më vonë ishte njoftuar se “një banor vendas ishte plagosur në zonë në të njëjtën kohë”, tha ai.
30-vjeçari i cili u plagos nga politikani, për fat të keq nuk ia ka dalë mbanë dhe ka ndërruar jetë në spital. Tanimë, një çështje penale është hapur ndaj politikanit.
Redkin është bashkëpronar i disa bizneseve të mëdha në gadishullin Kamchatka, dhe është përshkruar si një nga zyrtarët më të pasur publikë të Rusisë.
Ai tha se “kishte vendosur dhe ishte gati të pranonte dënimin që gjykata do të përcaktojë”. Sipas mediave ruse, politikani do të kalojë dy muaj në “arrest shtëpie” gjatë hetimit.
Burimi i lajmit: BBC News. Përshtatur nga Tirana Today
