Ish-zyrtari i lartë i Policisë së Shtetit, Arben Hajdarmataj ka versionin e tij lidhur me ngjarjen e rëndë të ndodhur ditën e djeshme në Shkodër, ku në zonën e Livadheve u gjend i vrarë Endri Mustafa.
I ftuar në emisionin ”Open”, Hajdarmataj deklaroi se Mustafa është mbajtur në një zonë të caktuar, pasi ishte deklaruar i humbur prej dy ditësh. Sipas tij, Mustafa është torturuar nga autorët, më pas është vrarë dhe transportuar në vendin ku është gjetur.
Në analizën e tij, ish-zyrtari shprehet se autorët kanë pasur kohë të mjaftueshme për të marrë informacion prej viktimës, dhe më pas e kanë ekzekutuar me gjakftohtësi.
Arben Hajdarmataj: ”Nëse do realizojmë vrasjen e të ndjerit kemi një situatë që është zhdukur për 2 ditë dhe gjendet i vdekur, ky person që është marrë nga autorët është mbajtur në një zonë x të caktuar, që ne nuk e dimë. Një person të merret dhe të mbahet 2 ose 3 ditë nuk mund të themi se rastësisht ka vdekur për shkak të torturave por e kanë marrë e kanë torturuar, është vrarë dhe është transportuar në vendin e krimit ku edhe është gjetur. Autorët kanë pasur kohë të mjaftueshme që të marrin informacion, vrasjen e kanë bërë me gjakftohtësi.
Autorët e krimit kanë qenë të qetë në momentin e ekzekutimit, pastaj mënyra se 2 në kokë, 1 në gojë e 3 në gjoks është dhe çështje momenti apo mllefi në mënyrën si komunikojnë viktima me autorin. Mund të jetë kod, por jo domosdoshmërish. Unë nuk arrij ta përkthej, por nuk mund të jem kategorik për kod tek mafioz sepse mua nuk më ka qëlluar të kem kode tek viktimat. Ka pasur një armë, shkëmbim zjarri. Ajo është një armë që mund të ketë qenë e autorit, mund të jetë armë që mund të ketë bërë dhe ndonjë vrasje tjetër.”
Trupi i pajetë i Mustafës është gjetur paraditen e djeshme në zonën e Livadheve në Shkodër, tri ditë pasi familja kishte dhënë alarmin për zhdukjen e tij. I riu, i cili kishte marrë plumba në gojë, gjoks dhe kokë, njihet nga Policia e Shkodrës për përfshirjen në një sërë ngjarjesh kriminale që prej vitit 2009 kur ishte dënuar për plagosje.
