Dalin detaje të reja lidhur me ngjarjen e mistershme që ndodhi në burgun grek në Koridhalos ku u gjet i vdekur një tjetër shqiptar.
Familjarët e 33-vjeçarit thonë për JOQ se ai quhet Bardhyl Tushaj dhe jo Bandiol siç e kanë publikuar mediat e tjera emrin. Vëllai i të ndjerit shkruan se Bardhylin e kanë helmuar në burg dhe se shoku i tij i qelisë ka thënë se ishte i gjallë dhe vdiq në spital. Ai shton se vëllain e tij e kanë helmuar shteti grek në vaktin e drekës.
Kjo është e vetmja e vërtetë sipas vëllait të viktimës Tusha. Familjari deklaron se vëllai i tij nuk ka qenë i dënuar për lëndë narkotike, por për armëmbajtje pa leje. Në burg Bardhyli kishte 1 vit e tre muaj.
Mediat greke shkruajnë se vdekja e Bardhyl Tushajt ka lidhje me vrasjen e shqiptarit Albert Bako, i cili u vra dy javë më parë në të njëjtin burg. Të dy shqiptarët ishin të akuzuar si pjesëtarë në ekzekutimin e avokatit të njohur grek, Mihalis Zafiroplulos, Bako si një ndër dy ekzekutoret, ndërsa Tusha si personi që strehoi Bakon dhe Ibrahim Ibrahimaj, ekzekutorin e avokatit, në banesën e tij në lagjen “Kalithea”.
Policia greke ka deklaruar se vdekja e shqiptarit Tusha ka ardhur për shkak të përdorimit të substancave narkotike në sasi të mëdha, por ministria e Drejtësisë nuk e konfirmon këtë fakt.
