Gjykata e Katanias ka marrë vendimin e parë për bandën e Habilajve, duke i lënë në burg. Të martën grupi i Habilajve doli përpara gjykatës së Catanias, dhe vetëm dy ditë më pas gjykata ka nxjerrë vendimin, ku mësohet se grupi është lënë në burg. Ata janë në procedurat e para, pasi anëtarët e bandës janë arrestuar falë një operacioni të cilësuar si ‘Compass Rose’, ku u shkatërrua një organizatë droge, shkruan meridionews.it.
Ishte një hetim, i kryer nga ushtria e Guardia di Finanza Gico Etna, i cili ka hedhur dritë mbi një organizatë të supozuar ndërkombëtare e specializuar në trafikimin e marijuanës.
Mijëra paund kanë fituar në periudhën 2013-2017, ku merrnin drogë nga Shqipëria dhe e trafikonin në krahinat e Catania, Siracusa dhe Raguzë, nën drejtimin e organizatorit të grupit, Moisi Habilaj.
Ky i fundit njihet dhe për lidhje familjare me ish-Ministrin e Brendshëm Saimir Tahiri. Tashmë Tahiri është nën hetim nga Prokuroria në Shqipëri, ndërsa në listën e anëtarëve të dyshuar të klanit është dhe një tjetër kushëri i politikanit, Florian Habilaj, i cili për momentin është ende në arrati.
Në dhomën e dëgjimit avokati Maurizio Catalano, mbrojtës Moisi Habilaj tha: “Ne jemi ende në fazën fillestare. I kam bërë thirrje për heqjen e masës së burgimit për shkak të mungesës së provave. Ne vetëm duhet të presim për vendimin “. Ai i kërkoi trupit gjykues që të parandalohet masa e burgimit për grupin. Por gjykatësi Antonino Riela tha se: “Pika kryesore është se kemi një rritje në masë të trafikimit të drogës. Klane të ndryshme mafioze po operojnë në vend. Ndër blerësit e drogës së grupit shqiptarë ishte dhe Sebastiano Sardo’.
Tashmë të arrestuarit do të vijojnë të qëndrojnë në qeli, ndërsa nga ana tjetër Prokuroria e Katanias do të nisë përgatitjen e dosjes për dërgimin për gjykim të 12 pjesëtarëve të këtij grupi të akuzuar për trafik ndërkombëtar të lëndëve narkotike.
Moisi Habilaj dhe bashkëpunëtorët e tij janë ndjekur e përgjuar për katër vite, ndërsa janë kapur 3.5 tonë hashash që ata trafikuan drejt Italisë. Dosja “Habilaj” në Itali hapi në Shqipëri çështjen “Tahiri”, e cila për opozitën është kthyer në “kalin e betejës” politike. Vendimi është depozituar rreth mesditës në sekretarinë e Gjykatës së Katanias nga tre gjyqtarët Larato, Benanti dhe Catena. Moisi Habilaj dhe bashkëpunëtorët e tij shqiptarë dhe italianë do qëndrojnë në burg deri në përfundim të procesit penal ndaj tyre./Tirana Today/
