Gjykata e Krimeve të Rënda ka pranuar kërkesën e Prokurorisë për sekuestro preventive të pasurisë së Klement Balilit, i njohur si “Eskobari i Ballkanit”.
Balili është në kërkim, ndërsa Krimet e Rënda vazhdojnë hetimet ndaj tij.
Kështu, sot është sekuestruar hoteli gjigant “Santa Quaranta” në Sarandë.
Sekuestrimi është bërë nga Krimet e Rënda, ndërsa Prokuroria ka dyshime se hoteli, i cili është në pronësi të vëllait të Klementit, është ndërtuar me para të ardhura nga aktiviteti kriminal.
Gjithashtu, Gjykata ka pranuar edhe kërkesën e Prokurorisë për sekuestron preventive të 20 apartamenteve në zonën bregdetare në pronësi të Balilit dhe familjarëve të tyre.
Emri i tij doli fillimisht në mediet greke në një mega-operacion kundër trafikut të drogës në të gjithë Ballkanin.
Klement Balili është person në kërkim për llogari të drejtësisë greke dhe asaj shqiptare dhe i dyshuar si personi që drejtonte një grup kriminal të trafikut të drogës në Ballkan drejt Evropës.
Vetë ai e mohoi këtë akuzë në të vetmen dalje publike pak ditë pas urdhër arrestit grek dhe nga ajo ditë është zhdukur duke iu fshehur policisë.
