Pas rrjedhjes së votave p9r zgjedhjen e Ruçit në krye të Kuvendit, PD ka dalë me një deklaratë zyrtare, ku dënon atë që ndodhi dje në Parlament.
Në deklaratë thuhet se kush shet votën, nuk do të ketë më vend në grupin parlamentar, duke paralajmëruar përjashtimin e deputetëve që votuan pro Ruçit.
Gjithashtu, në deklaratë theksohet se ky skenar u vu në veprim për të hequr vëmendjen e opinionit nga emërimi prej Edi Ramës në krye të Kuvendit i Gramoz Ruçit.
Deklarata:
Grupi Parlamentar i Partisë Demokratike dënon me ashpërsi atë cfarë ndodhi dje me votën e opozitës në Kuvend. Erdhi si rezultat i manipulimit apo blerjes së votes, kjo do të shqyrtohet me prioritet absolut. Një gjë është e qartë pa asnjë ekuivok: kush shet votën nuk do të ketë vend në grupin tonë parlamentar.
Grupi Parlamentar i Partisë Demokratike vlerëson se ky skenar i qëllimshëm u vu në veprim për të hequr vëmendjen e opinionit nga emërimi prej Edi Ramës në krye të Kuvendit i Gramoz Rucit, simbol i të kaluarës së përgjakur të diktaturës komuniste dhe i lidhjeve kriminale dhe trafiqeve të drogës, për të cilën arsye është përjashtuar përherë nga hyrja në SHBA.
