Pas gjashtë seancave të ndërprera, Kadri Veseli është zgjedhur kryetari i ri i Kuvendit të Kosovës me 62 vota pro.
Kundër zgjedhjes së Veselit si kryetar i Kuvendit kanë votuar 52 deputetë.
Zgjedhja e Veselit vjen pasi partitë e koalicionit PAN-AKR vendosën që të thirret seanca e sotme me të vetmen pikë të rendit të ditës, zgjedhjen e kryetarit dhe nënkryetarëve të Kuvendit.
Nënkryetarë të Kuvendit janë zgjedhur Aida Dërguti, Xhavit Haliti dhe Kujtim Shala me 113 vota pro.
Nga momenti i zgjedhjes së kryetarit dhe nënkryetarëve, Kuvendi konsiderohet i konstituuar.
Bazuar në Kushtetutën e Kosovës, i takon koalicionit PDK, AAK, Nisma, AKR dhe pakicat që të nominojnë edhe zyrtarisht mandatarin për formimin e Qeverisë së re, ku pritet që të jetë lideri i AAK-së, Ramush Haradinaj.
Ky i fundit, sipas procedurave duhet të marrë bekimin e presidentit të Kosovës Hashim Thaçi, i cili i drejtohet Kryesisë së re të Kuvendit me kërkesën për thirrjen e seancës për zgjedhjen e Qeverisë.
Pas konstituimit të Kuvendit, votimi për Qeverinë mund të ndodhë duke filluar që sot pasdite, por edhe brenda periudhës kohore prej 15 ditëve.
