Ismail Morina, i njohur ndryshe si Ballisti që ngriti dronin në Beograd, ka bërë lëvizjen e radhës pas vendimit të gjykatës kroate për ekstradimin e tij në Serbi.
Ismail Morina ka kërkuar azil politik në Kroaci. Lajmi bëhet i ditur nga avokati i Morinës, Darko Butigan i cili konfirmoi se Morina ka aplikuar për azil politik në shtetin kroat.
Më herët, gjykatësi kroat Pero Miloglav, i cili mori vendimin për ekstradimin e Ismail Morinës në Beograd është shprehur se ky vendim ka shumë gjasa që të hidhet poshtë.
Gjykatësi e bëri lajmin të ditur në një intervistë për gazetën serbe “Vecernje Novosti”, teksa tha se vendimin mori në bazë të dokumenteve që kishte në tryezën e tij, por shtoi se tashmë çështja kalon në Gjykatën e Lartë të Zagrebit që do të japë edhe vendimin përfundimtar.
Miloglav tha se mundësitë që Gjykata e Lartë ta zhvlerësojë ekstradimin janë të mëdha.
Gjithsesi, tashmë mbetet për t’u parë nëse kërkesa e Morinës për azil politik do të pranohet, ose jo.
