Gjykata e Krimeve të Rënda ka vendosur sekuestrimin e aksioneve të gruas së deputetit, Alfred Peza. Kështu, sipas vendimit të gjykatës, janë sekuestruar aksionet me vlerë rreth 113 milionë lekë të reja.
Peza po hetohet për fshehje pasurie dhe pastrim parash, ndërsa vendimi vjen pas kërkesës së Prokurorisë së Krimeve të Rënda, ndërsa deputeti i mazhorancës nuk ka mundur të justifikojë pasurinë e tij.
Gjithashtu, Prokuroria e Krimeve te Rënda kërkon në gjykatë, sekuestrimin e pasurive të deputetit të Partisë Socialiste.
Hetimet ndaj deputetit nisën pas publikimit të një kontrate noteriale në Citynews.al, sipas së cilës bashkëshortja e tij kishte investuar shumën prej 1.14 milionë dollar për të blerë aksione në një bankë të nivelit të dytë.
Por, vetë deputeti Peza deklaroi për mediat, jashtë dyerve të prokurorisë, se çdo qindarkë të pasurisë së tij, ai e ka fituar me punë të ligjshme.
