Ministri i Jashtëm grek, Nikos Kotzias ka dhënë dorëheqjen. Mësohet se vendimi për dorëheqjen e ministrit Kotzias ka ardhur pas një debati që ka pasur me ministrin Kammenos.
Debati mes tij dhe ministrit grek të Mbrojtjes ndodhi dje gjatë mbledhjes së kabinetit, ndërsa në fokus kishte marrëveshjen e Prespës.
Sipas “Kathimerinit”, Kotzias ishte i pakënaqur për faktin se kryeministri Alexis Tsipras nuk e mbështeti atë kundër sulmeve nga Kammenos, i cili është gjithashtu partner i vogël i koalicionit.
I njëjti burim ka thënë se gjatë takimit të kabinetit të së martës Kammenos akuzoi Kotzias për keqmenaxhimin e fondeve sekretet të ministrisë së Jashtme, duke e cilësuar atë si njeri i Sorosit. Nga ana tjetër, Kotzias është shprehur se Kammenos ‘fut hundët në politikën e jashtme’.
Ndihmësit pranë ministrit të Jashtëm thanë se ai ishte “thellësisht i ofenduar” nga akuzat dhe nga fakti që nuk mori mbështetjen e kryeministrit, duke marrë vendimin të dorëhiqet si ministër i Jashtëm.
