Shqiptarët që jetojnë në shtetin e Maqedonisë janë paragjykuar, dhunuar dhe trajtuar në forma nga më çnjerëzore. Sikur të mos mjaftonte kjo pjesë, edhe strukturat ligjzbatuese nuk kanë zbardhur rastet e dhunës.
Branko Sinadinovski, themeluesi i Bashkësisë Fetare të Shqiptarëve Ortodoksë në Maqedoni është sulmuar sot në mesditë. Sinadinoivski është goditur fizikisht nga dy persona të panjohur. Rasti është paraqitur në polici, e cila po heton dinamikën dhe motivet e ngjarjeve.
Sinadinovski është sulmuar fizikisht, në afërsi të banesës së tij në lagjen Aerodrom. Profesori dhe ish-ambasadori Sinadinovski u bë i njohur vite më parë për opinionin, pas deklarimit të prejardhjes së tij etnike dhe mbështetjes për krijimin e një Bashkësie Fetare të Shqiptarëve Ortodoksë në Maqedoni. Ai është me prejardhje nga Beliçica e Rekës së Epërme nga rajoni i Mavrovës në Maqedoni.
Gjatë ditës gazeta Lajm arriti të kontaktojë me dhëndrin e tij, i cili tha se profesor Sinadinovski është sulmuar nga dy persona të panjohur dhe se ka marrë lëndime të rënda.
“Nuk është në rrezik jete, por ka marrë lëndime të rënda. Dy persona të panjohur e kanë sulmuar para banesës ku jeton duke e goditur në kokë, në fytyrë dhe në stomak. Me ndihmën e shpejtë e kemi transferuar në spital”, deklaroi dhëndri i Sinadinovskit. Nga policia as nuk e kanë konfirmuar as edhe hetuar rastin në fjalë.
