Ndarja nga jeta e Muhamet Likos la pas dhimbje të madhe për familjarët, miqtë, kolegët e artdashësit shqiptarë.
Grupi “Parodistët e Vlorës” s’mund të jetë kurrsesi njësoj pas largimit të Likos, ndërsa parodistët e tjerë kanë shpërthyer në lot për humbjen e shokut të tyre aq të dashur.
Është e trishtueshme të shohësh që Afrim Agalliu, Agron Hamo dhe Mane Lumani nuk i mbajnë dot lotët, teksa nga katërshja e pandashme, ata kanë mbetur tashmë tre.
Siç shihet edhe nga fotot e shpërndara nga mediat lokale, ata janë mes familjarëve dhe miqve që po nderojnë për herë të fundit Likën në teatrin “Petro Marko” të qytetit të Vlorës. Në ceremoninë e homazheve, Afrimi, Agron dhe Maneja nuk e fshehin dot dhimbjen.
Liko u nda papritur nga jeta në moshën 64-vjeçare. Ai ishte tërhequr nga skena prej disa kohësh për shkak të problemeve me zemrën.
Aktori iu ishte nënshtruar disa ndërhyrjeve, por me sa duket artisti i madh nuk ia doli të fitonte.
Muhamet Liko lindi më 26 Qershor të vitit 1955 në qytetin e Vlorës. Daljen e parë në skenë e pati në vitin 1978, ku u bashkua së bashku me 3 parodistët e tjerë.
Parodistët e Vlorës fituan zemrat e të gjithë shqiptarëve me humorin e tyre brilant të ndërthurur edhe me këngën duke i mbijetuar brezave për vite të tëra.
Katër paraodistët Afrim Agalliu, Agron Hamo, Mane Lumani dhe Muhamet Liko u shfaqën së bashku për herë të fundit vetëm disa ditë më parë në skënën e teatrit ‘Petro Marko”. Liko duartrokiti parodistët e rinj të estradës së re në Vlorë dhe më pas u nis për kontrollin në Itali, por nuk ia doli dot.
Liko mban shumë tituj dhe çmime për artin që ka transmetuar tek njerëzit, ndërsa së fundmi është vlerësuar nga presidenti i Republikës me titullin “Mjeshtër i madh”. Ai la pas dy fëmijë dhe gruan e tij.
