Një lajm shumë i keq ka ardhur ditën e sotme në familjen e Pep Guardiolës. Mamaja e trajnerit të Manchester City, Dolores Sala Carrio ka ndërruar jetë për shkak të infektimit me Covid-19. Dolores ishte 82 vjeç dhe banonte në Barcelonë, ku edhe u nda nga jeta.
Lajmin e hidhur e ka dhënë për mediet klubi i Manchester City, që gjithashtu shpreh ngushëllime për Guardiolën dhe familjen e tij. Një lajm shumë i dhimbshëm për teknikun spanjoll, i cili ditë më parë ishte autor i një donacioni prej 1 milionë eurosh për spitalin e Barcelonës, në të cilin vdiq edhe nëna e tij.
“Familja e Manchester City e hidhëruar njofton vdekjen e nënës së Pep, Dolors Sala Carrio, pas infektimit me koronavirus. Ajo ishte 82 vjeç. Të gjithë pjesëtarët e klubit dërgojnë ngushëllimet e tyre më të përzemërta në këtë kohë të vështirë për Pep, familjen e tij dhe të gjithë miqtë e tyre”, shkruhet në deklaratën e klubit anglez.
