Thomas Strakosha është renditur si një nga portierët e formacionit ideal të datëlindjes së vitit 1995. Portieri i talentuar i Serisë A ka tërhequr vëmendjen me pritjet e tij, duke zgjuar interes të madh edhe tek klubet e mëdha evropiane.
Sajti italian “Fantagazzetta” ka krijuar një formacion ideal të futbollistëve më të talentuar të lindur në 1995, ku bën pjesë edhe Strakosha.
“Lindur në Athinë, Greqi, nga prindër shqiptarë, djali i Fotaqit portierit legjendar shqiptar i datëlindjes 1960. Thomasi ka ndjekur gjurmët e babait të tij, duke kultivuar pasionin e tij për rolin e portierit. Ai është zbulim i Igli Tares, Drejtorit të Lacios, që e solli atë në Itali dhe e bëri pjesë të “bardhekaltërve” në vitin 2012/2013.
Talenti i tij ka qenë gjithmonë në ngritje nga viti në vit, duke i zënë vendin Marketit, ndërsa po përgatitet të marrë pishtarin e Berishës te kombëtarja shqiptare”, ishte përshkrimi i sajtit Italian për portierin e Kombëtares shqiptare.
Ja formacioni më i mirë i datëlindjes 1995 sipas “Fantagazzetta”:
Strakosha, Akanji, Jimenez, Romanjoli, Marsial, Rabiot, Milinkoviç-Saviç, Kristante, Lozano, Keita, Piontek.
