Kosova ka një kombëtare të re në moshë dhe të mbushur me shumë talente, por duket se të shumtë janë edhe ata që nuk i janë bashkuar akoma. Dardanët i kanë ‘rrëmbyer’ edhe dy futbollistë mjaft të talentuar Zvicrës. Bëhet fjalë për Shkëlqim Demhasajn dhe Mirlind Kryeziun.
Ditën e sotme ata kanë bërë me dije se janë pajisur me pasaportën e Kosovës dhe janë të gatshëm që ti bashkohen përfaqësueses që në ndeshjet e nëntorit. Trajneri Shaland për 2 ndeshjet vendimtare të Ligës së Kombeve atë ndaj Maltës dhe Azerbajxhanit do të ketë edhe dy përforcime të reja.
Si Demhasaj ashtu edhe Kryeziu kanë luajtur deri më tani për 21-vjeçarët e Zvicrës. Për sa i përket Demhasajt kohë më parë u përfol se ai mund t’i bashkohej Kombëtares shqiptare, por ai ka preferuar të veshë fanellën e “dardanëve”. Në një prononcim për “Telegrafin”, Demhasaj shprehet:
“Jam shumë i lumtur që pak çaste më parë kam marrë pasaportën e Kosovës. Tani jam i gatshëm dhe në dispozicion për trajnerin Shaland në ndeshjet e nëntorit.
Do të mundohem të jap më të mirën nga vetja për të shënuar shumë gola për Kosovën dhe për t’i bërë ëndrrat realitet të njerëzve tanë. Kam marrë vendimin e duhur për të luajtur me Kosovën. Ka qenë një vendim i marrë së bashku me familjen dhe agjentët e mijë. Mezi po pres ta vesh fanellën më të bukur në botë, atë të Kosovës”, u shpreh Demhasaj.
Kujtojmë që sulmuesi aktivizohet me Luzernin në kampionatin zviceran, teksa në 12 ndeshje ka shënuar 6 gola si dhe ka dhënë 3 asiste. Ndërkohë për sa i përket mbrojtësit Kryeziu ai është pjesë e Zyrihut.
