Spitali Universitar “Shefqet Ndroqi” ka realizuar dy operacione të avancuara në zemër përmes teknikave minimal invazive, një arritje e rëndësishme në fushën e kirurgjisë kardiake. Lajmi u bë i ditur nga ministrja e Shëndetësisë, Albana Koçiu, përmes rrjeteve sociale.
Në rastin e parë, një paciente 45-vjeçare iu nënshtrua një operacioni kompleks ku u zëvendësuan valvula mitrale, valvula aortale dhe aorta ascendente përmes teknikës së hemisternotomisë. Në rastin e dytë, një paciente 55-vjeçare iu zëvendësua rrënja e aortës dhe aorta ascendente përmes teknikës Bentall, gjithashtu duke përdorur hemisternotominë.
Këto ndërhyrje ofrojnë avantazhe të mëdha, si prerja minimale (vetëm 7-8 cm), një ecje të shkëlqyer postoperatore pa komplikacione dhe mundësinë që pacientet të dalin nga spitali brenda pesë ditësh. Kjo konfirmon se në Spitalin “Shefqet Ndroqi”, teknikat minimal invazive po përdoren për operacione komplekse dhe të kombinuara, duke përmirësuar ndjeshëm trajtimin dhe rikuperimin e pacientëve.
Ministrja Koçiu shprehu mirënjohje për ekipin operator të jashtëzakonshëm, të udhëhequr nga Dr. Albi Fagu, Dr. Ketion Menkshi, Dr. Marjeta Bilaj dhe Dr. Anri Gongo. Ky sukses përbën një hap përpara në shëndetësinë shqiptare dhe është një lajm i shkëlqyer për pacientët që kanë nevojë për ndërhyrje të avancuara.
