Kryeqyteti rus, në dy muajt e fundit ka marrë rreth 500 thirrje telefonike duke lajmëruar për bomba. Nga numri i madh i alarmeve false janë shpenzuar miliona dollarë dhe është kthyer në një fenomen shqetësues dhe të kushtueshëm për Moskën.
Nga fillimi i muajt shtator ka pasur një numër të lartë të telefonatave të rreme për bombë.
Vende e shënjestruara për sulmet false ishin aeroportet, stacionet e trenave, qendrat tregtare, bankat, hotelet, shkolla dhe ndërtesat e institucioneve të shtetit rus.
Duhet theksuar se në asnjë nga thirrjet kërcënuese nuk ka pasur shpërthime të bombave.
Shefi i departamentit të sigurisë në Moskë, Vladimir Chernikov ka thënë të martën se afro 250.000 persona janë evakuuar pas 564 kërcënimeve anonime për sulme me bomba, në mes të 11 shtatorit deri më 9 nëntor.
Agjencia për siguri vendore (FSB), ka njoftuar se shumica e thirrjeve janë bërë nga disa rusë që jetojnë jashtë vendit, ndërsa motivet e thirrjeve nuk janë bërë të ditura.
