Ministria e Kulturës ka shtyrë thirrjen e hapur për aplikim për pozicionin e Drejtorit të Përgjithshëm të Teatrit Kombëtar të Operas, Baletit dhe Ansamblit Popullor nga data 29 mars, deri në datën 6 maj.
Drejtorja aktuale Zana Çela, ka konfirmuar kandidaturën e saj, ku ka dorëzuar dosjen duke ju përmbajtur limitit të afatit të vendosur fillimisht nga Ministria e Kulturës për aplikimet.
Zana Çela nuk është e vetmja në garë. Josif Gjipali dhe Zana Çela janë sërish në garë për postin e Drejtorit të Teatrit Kombëtar të Operas dhe Baletit dhe Ansamblit të Këngëve e Valleve Popullore.
Tenori i njohur dhe Çela kanë qenë finalistë të garës për Drejtor të Përgjithshëm të “Operas” edhe në 2016-ën, pas largimit të Ilir Kernit, por në atë kohë zgjedhja e kryeministrit Rama, ishte pikërisht drejtorja aktuale, prej afro 6 vitesh në detyrë.
Josif Gjipali është tenori i mirënjohur me një karrierë të suksesshme në skenat e Europës. Pas një karriere të suksesshme në Shqipëri, ai sot debuton në operën e La Scalas, Milano si dhe në të gjithë skenat më prestigjoze të Europës.
Jo pak të njohur janë dhe emrat e tjerë duke nisur nga Zana Çela e cila prej muajsh ka mbaruar mandatin e saj në krye të këtij institucioni. Në ditët në vijim pritet që të bëhen publikë emrat e tjerë që do kandidojnë, duke qenë se është shtyrë afati i aplikimeve deri më 6 maj. Vendimi për të shtyrë afatin është marrë për t’u dhënë më shumë kohë për të kandiduar, duke qenë se ka pasur paqartësi për kriteret.
