Këshilltarët demokratë dhanë votën e tyre kundër pikës së rendit të ditës të Këshillit Bashkiak, që kërkonte miratimin e fondeve shtesë për realizimin e projektit Veliera.
Duke përsëritur edhe njëherë gjithë akuzat dhe kundërshtitë e Partisë Demokratike dhe këshilltarëve demokratë kundër këtij projekti, anëtari i këshillit, juristi demokrat Ivo Jorgoni, ndërsa deklaroi votën e tij kundër, gjatë fjalës së tij ai akuzoi pushtetarët vendorë: “po tregoni dita ditës se ligjet dhe vendimet e gjykatave mund të shkelen kur jeni të veshur me pushtet”, raporton portali “DurresLajm”.
Deklarata e këshilltarit Ivo Jorgoni
Me Velieren keni shkelur ligjin si “Kali mbi kalldrëm”
Sot, është servirur një akt ku na kërkohet të miratojmë disa shtesa fondesh në favor të projektit Veliera.
E pakonceptueshme të kërkoni konsensusin tonë në këtë pikë, ku qartazi Këshilltarët e djathtë dhe Partia Demokratike kanë qenë kundra ndërtimit të Velieres që në gjenezë, atje ku Veliera ishte akoma në letër. Ishte një shpenzim luksi i panevojshëm në krahasim me nevojat jetike të qytetarëve të këtij qyteti.
Nga letra në terren sot Veliera nuk është më problem lokal që kundërshtohet vetëm nga këshilltarët e djathtë, sot Veliera është shembulli Kombëtar se si pushteti ka errësuar sytë dhe kërkon me çdo kusht të vrasë historinë duke shkelur ligjin nën dritën e diellit.
Askush këtu nuk mund të kundërshtojë faktin se Bashkia i ka filluar punimet pa përfillur institucionet që merren me arkeologjinë. Datat e akteve të lëshuara nga Bashkia e faktojnë këtë. I verifikoni!
Askush këtu nuk mund të kundërshtojë faktin që Bashkia me plinta betoni ka dëmtuar një pjesë të rëndësishme të zbulimeve të nëntokës. Plintat janë aty si fakte të pakundërshtueshme. I verifikoni!
Askush këtu nuk mund të kundërshtojë faktin që po punohet në Zonën A, e cila me ligj ndalon çdo lloj ndërtimi. E keni ligjin përpara. Lexojeni!
Askush këtu nuk mund të kundërshtojë faktin që vazhdohet punohet kundër dy vendimeve të gjykatave, duke vrarë Shtetin e së drejtës. Kërkoni ndihmë juridike për t’u iluminuar çdo të thotë të shkelësh një vendim Gjykate.
Unë e kam të qartë që këto fakte nuk janë të panjohura për ju, aq sa jam i qartë se çdo veprim apo mosveprim nuk e keni nga padija, por nga forca që ju jep pushteti për të ecur mbi ligjin si kali në kalldrëm.
Si qytetar Durrësi e kundërshtoj, sepse europian më bën historia e faktuar e ekzistencës së qytetërimit tonë, e cila ndodhet nën toke dhe jo Veliera mbi të.
Si jurist e kundërshtoj, sepse nuk mund të bëhem palë me asnjë lloj individi apo grupi individësh, që ecin mbi ligjin dhe shtetin e së drejtës.
Si Këshilltar i djathtë dhe anëtar i Partisë Demokratike kundërshtoj, sepse na keni etiketuar si pengues të Vetingut, ndërkohë që Ju! Etiketuesit! Po tregoni dita-ditës se ligjet dhe vendimet e gjykatave mund të shkelen kur jeni të veshur me pushtet.
Vota ime është kundër!
