Një 27-vjeçar nga Shkodra, i shpallur në kërkim, ka arritur t’i shpëtojë policisë së Durrësit në pikën kufitare. Bëhet fjalë për Armando Ndreun, i cili akuzohet për “vjedhje” dhe “kundërshtim të punonjësit të policisë”, i cili është zhdukur pa asnjë gjurmë nga trageti i linjës Bari-Durrës, ndërsa autoritet prisnin ta arrestonin.
I riu u shpëtoi prangave mëngjesin e sotëm,ndërsa pala italiane e kishte kthyer me tragetin e radhës, menjëherë pasi shkeli në portin e Barit.
Ndreu është nisur nga porti i Durrësit mbrëmjen e së enjtes me një biletë për në Bari dhe nuk është ndaluar nga autoritet e policisë, pavarësisht se ndaj tij kishte një urdhër arresti dhe ishte i shpallur në kërkim policor.
Ai u ndalua mëngjesin e së premtes, kur ka kërkuar të vulosë pasaportën në Bari. Karabinierët italianë nuk kanë lejuar hyrjen e tij në shtetin italian dhe e kanë dërguar sërish për në Shqipëri.
Trageti ka mbërritur në orën 8 të mëngjesit, kohë kur kanë zbritur të gjithë pasagjerët, por vetëm personi i cili ishte i shpallur në kërkim nuk ka mundur të identifikohet nga policia.
Në kushte të tilla, kur një person i shpallur në kërkim nuk ka zbritur në port, janë vënë në alarm të gjitha autoritetet.
Sipas burimeve dyshohet që i riu të ketë zbritur nga trageti dhe të jetë larguar nga terminali i ndihmuar nga ndonjë person tjetër.
Pritet që për largimin e 27-vjeçarit drejt Italisë, të merren masa ndaj oficerëve të cilët kanë bërë kontrollin e kanë firmosur pasaportën e tij. Deri tani policia nuk ka dhënë zyrtarisht asnjë version mbi ngjarjen.
