Ish-mesfushori i Milanit dhe Interit, holandezi Clarence Seedorf është zyrtarizuar si trajneri i ri i Deportivo La Corunas. Në sezoni 2013-14 ai kishte një eksperiencë të shkurtër tek Milani, por nuk arriti ta mbyllë sezonin për shkak të rezultateve të dobëta.
Më pas ishte në bisedime me Kombëtaren shqiptare e cila ishte në kërkim të një trajneri, por nuk arriti ta bindte Federatën Shqiptare të Futbollit dhe u zgjodh Christian Panucci. Ndërsa tani ka marrë në drejtim ekipin ë La Ligas e cila ndodhet në vendin e 18 dhe rrezikon të përfundojë në kategorinë më poshtë.
Klubi spanjoll ka thënë se holandezi do ta drejtojë klubin vetëm për pjesën e mbetur të sezonit, ndërsa në fund do të shikohet mundësia e vazhdimit. “Trajneri holandez Clarence Clyde Seedorf këtë pasdite është bërë trajner i Real Club Deportivo për pjesën e mbetur të sezonit”, konfirmoi një deklaratë në faqen zyrtare të internetit të klubit.
“Seedorf do të paraqitet këtë pasdite (e hënë) në ora 20:15 në dhomën e shtypit të stadiumit Abanca-Riazor. Clarence Seedorf vjen në klub së bashku me trajnerin Valerio Fiori”, mbyllet deklarata zyrtare e klubit spanjoll. Seedorf në vitin 2017 ishte i papunë, ndërsa skuadra e fundit ku ishte trajner ishte ajo kineze, Shenzen.
