Një fenomen jo pak i çuditshëm, ka prekur këto ditët e fundit tregun e bananeve, çmimi i të cilave ka pësuar një rritje prej 35 %. Një gjë të tillë e kanë bërë të ditur vetë tregtarët e pakicës, të cilët janë detyruar që ta shesin frutin me një çmim akoma më të lartë.
Në fillimin e javës një kg banane shitej me 170 lekë, ndërsa në fundjavë është shitur me një çmim prej 230 lekësh. Mesa duket sasia e drogës e gjetur në kontenierin, që po vinte nga Kolumbia me ngarkesën e bananeve ka dhënë impakt dhe në çmimin e frutit në tregun shqiptar, sigurisht që edhe kontrollet e shumta të policisë, i ka bërë importuesit të limitojnë furnizimin e pakicës.
Tregtarët thanë se çmimi është rritur nga importuesit e frutit dhe tregu i shumicës është çrregulluar. Dy ditët e fundit tregtarët e pakicës thanë se janë ndeshur me radhë të gjatë për tu furnizuar. Përpos vështirësive në furnizim, çmimi ka pësuar rritje. Tregtarët pohojnë se çmimet e bananeve luhaten në masa të vogla, për shkak të problematikave që ka vijueshmëria e furnizimit nga vendet e largëta.
Por këtë herë çmimi është rritur në një ditë me një vlerë të lartë. Tregtarët pohojnë se, arsyeja këtë herë lidhet me problematikën që krijoi sasia e drogës që u kap e kamufluar në banane. Konsumi i bananes për frymë në vend sipas përllogaritjeve të ‘Monitor’ është afërsisht 8 kg në vit, ndërsa mesatarja botërore është 12 kg për frymë. Krahasuar me vendet e rajonin, konsumi i bananes për frymë është ndër më të lartët në rajon.
Sipas të dhënave të Doganës, origjina e bananeve të hyra në Shqipëri gjatë 2016-s është ngushtuar vetëm në tre shtete: Kolumbi, Ekuador, Meksikë, raporton Monitor.
Sipas të dhënave të doganës, në total gjatë 2016-s janë importuar nga këto tri shtete të Amerikës Latine 22 mijë tonë banane me një rritje prej 9 përqindësh krahasuar me një vit më parë. Ndërsa në vlerë, i gjithë totali i bananeve të importuara në Shqipëri përllogariten rreth 16.9 milionë dollarë.
Peshën më të lartë të eksporteve e zënë bananet e importuara nga Ekuadori, apo rreth 77 për qind e të gjithë totalit në 2016-n. Rreth 11 për qind e tyre vijnë nga Meksika dhe 12 për qind të peshës e zinin bananet e sjella nga Kolumbia.
