Joao Cancelo po tregon vlerat e tij në fushë me Interin këtë sezon aq shumë sa ka bërë një tifozeri të tërë të dashurohet me të. Por ajo që e bën akoma më të lartësuar karrierën e Cancelos deri më tani është vështirësia të cilën ai ka hasur rrugës dhe fakti që ka arritur të arrijë këto nivele pavarësisht pengesave jo të vogla dhe tepër të dhimbshme.
Lojtari i ri portugez ka pësuar një tragjedi vetëm pesë vite më parë, kur ai ishte vetëm 19 vjeç. Ishte data 5 Janar 2013 dhe në atë kohë lojtari luante tek Benfica B por gjithashtu filloi të grumbullohej disa herë me skuadrën e parë.
Çdo gjë dukej se po shkonte për mrekulli deri kur jeta vendosi të bënte një shaka tepër të hidhur me të. Mamaja e tij përfshihet në një aksident automobilistik dhe humbet jetën. Në të njëjtën makinë ishte edhe Cancelo, por që shpëtoi me vetëm disa dëmtime të vogla.
Cancelos në atë kohe ju desh goxha kohë te merre veten nga kjo tragjedi sepse nuk mund të jetë e lehte për një djalosh 19 vjeçar të shikojë nënën e tij teksa humbiste jetën e sidomos duke qënë në një makinë bashkë.
Por me forcë dhe vullnet ai arriti ta kalonte këtë tragjedi dhe kalimi tek Valencia i dha mundësinë të fillonte një jetë të re larg Portugalisë ku në atë kohë kishte vetëm kujtime të trishta. Kjo është arsyeja se pse Cancelo pothuajse në çdo foto të tijën në rrjetet sociale shkruan poshtë tek caption: #MommyBlessMe që në shqip do të thotë “Mami me beko”.
Në të gjitha intervistat e tij në karrierë Cancelo gjithmonë falënderon mamanë e tij dhe nuk e harron kurrë. Madje edhe numri 7 që ka marrë tek Interi ka të bëjë pikërisht me këtë, është ditëlindja e mamasë së tij. E më në fund, numri 7 që është konsideruar një numër tersi për vite me radhë tek Interi tashmë mund të mos quhet më i tillë pas ardhjes së Cancelos!
