Mbërrin në zyrat e Komisionit të Venecias letra e kreut të Kuvendit Ruçi, mbi draftin e opozitës për vetting në politikë.
Të kontaktuar nga News24, përfaqësues të Komisionit bëjnë të qartë se kërkesa e Ruçit do të ndiqet bazuar në praktikat e këtij organi.
Po ashtu, një delegacion do të vizitojë Tiranën për të marrë mendimet e palëve.
“Komisioni i Venecias ka marrë kërkesën ditën e mërkurë. Prandaj procedura ekzakte ende nuk është përcaktuar. Por në përputhje me praktikat e përgjithshme, një delegacion nga Komisioni i Venecias do të vizitojë Shqipërinë. Kjo për të diskutuar draft amendamentet me të gjitha palët e interesuara.”
Në letrën e tij, kryeparlamentari kërkon opinionin e Komisionit mbi praktikat ndërkombëtare në kontrollin e figurës së të zgjedhurve. Ndërsa shtrohet pyetja a është ndërhyrja në të drejtën për mbrojtjen e reputacionit.
