Partia Socialiste ka propozuar ndryshime të rëndësishme në ligjin për Policinë e Shtetit, duke synuar heqjen e konkursit për shumicën e posteve drejtuese dhe riformatimin e sistemit të gradave në polici. Sipas socialistëve, procedurat aktuale të konkurrimit janë kthyer në pengesë për funksionimin normal të strukturave policore dhe kanë ulur eficencën në terren. Me draftin e ri, drejtuesit e departamenteve, drejtorive vendore dhe komisariateve nuk do të zgjidhen më përmes garës, ndërsa konkursi do të mbetet vetëm për postin e Drejtorit të Përgjithshëm të Policisë së Shtetit. Ligji aktual, i miratuar në korrik të vitit 2024, kishte futur konkurrimin për të gjitha nivelet më të larta drejtuese, sistem me të cilin u përzgjodhën edhe drejtuesit e fundit të policisë, Ilir Proda dhe Skënder Hita.
Deputeti socialist Bujar Rexha, propozues i ndryshimeve, argumenton se proceset e stërzgjatura burokratike kanë penguar reagimin operacional dhe administrativ të policisë, duke sjellë vonesa dhe mungesë produktiviteti në përzgjedhjen e drejtuesve. Ndryshimet prekin edhe trajtimin e ish-drejtuesve të lartë. Sipas draftit, një ish-Drejtor i Përgjithshëm do të marrë gradën “Drejtues i Parë” dhe do të mund të vijojë kontributin në polici në role këshillimore, akademike apo si oficer kontakti, me synimin që eksperienca e fituar ndër vite të mos humbasë.
Po ashtu, propozohet shkurtimi nga 5 në 4 vite i afatit për kalimin nga grada “komisar” në “kryekomisar” dhe nga “kryekomisar” në “drejtues”, duke vendosur më shumë fokus tek performanca dhe rezultatet në punë. Drafti i jep gjithashtu kompetencë Drejtorit të Përgjithshëm të Policisë së Shtetit që, në raste të veçanta, të shpërblejë efektivët me gradë të menjëhershme për akte heroike, sakrifica apo rrezikshmëri të lartë gjatë ushtrimit të detyrës në luftën kundër krimit dhe garantimin e rendit publik.
Ndërkohë, edhe pse ndryshimet në ligj ende nuk janë miratuar, kryepolici Skënder Hita ka nisur zbatimin e procedurave të ligjit aktual, duke hapur garën për disa drejtori vendore qarqesh dhe poste shefash komisariatesh. Bëhet fjalë për qarqet e Lezhës, Durrësit dhe Fierit, ku kandidatët kanë dorëzuar aplikimet deri më 20 maj. Burime pranë Policisë së Shtetit bëjnë me dije se hapja e garës nuk lidhet me lëvizje të reja emrash, por me formalizimin sipas ligjit të drejtuesve të komanduar aktualisht në këto poste. Po ashtu, gara është hapur edhe për disa komisariate në vend, aty ku janë bërë ndryshime pas marrjes së detyrës nga Skënder Hita. /A2cnn/
