Paraditen e sotme ka përfunduar procesi gjyqësor për Emiljano Shullazin, dhe grupin kriminal të drejtuar prej tij. Prokuroria do të japë pretencën më 26 qershor 2018, në orën 09:00.
Të pandehur janë Emijano Shullazi, Blerim Shullazi, Gilmano Dani, Endri Qyqja dhe Endri Zela. Ata akuzohen për kanosje për shkak të detyrës, kryer në bashkëpunim, si dhe për grup të strukturuar kriminal. Ata kërcënuan rektorin Mynyr Koni, si dhe biznesmenin Ylvi Beqja, me qëllim që t’i merrnin hotel Vollgën.
Sot në seancë gjyqësore janë sjellë provat nga disa banka, për çeqe të tërhequra e të thyera nga Beqja dhe Shullazi.
Emiljano Shullazi akuzohet si kreu i një grupi kriminal për gjobëvënie. Sipas Prokurorisë, Shullazi ka gjobitur tre biznesmenët Ylvi Beqja, Jani Zaka dhe Adriatik Këçuku si dhe ka kërcënuar për t’u tërhequr nga gara kandidatin për rektor Mynyr Koni, si dhe ka kanosur rektorin Dhori Kule. Ylvi Beqja, është dëshmitari kyç kundër Emiljano Shullazit dhe të pandehurve, Gilmando Dani, Endrit Qyqja, Endrit Zela dhe Blerim Shullazi.
“Kam patur problem me një proces gjyqësor në Apel, që lidhej me ish-hotel Vollgën. Avokati im më tha se këtë çështje mund të ma zgjidhte Emiljano Shullazi. E kam takuar dhe me të ramë dakord, që nëse me zgjidhte problemin në fjalë, do të merrte 30 për qind”, ka deklaruar Beqja pak kohë më parë, para trupit gjykues.
