Situata e ndezur politike në vend, dalja e përgjimeve të “dosjes Habilaj”, përfshirja e ish-ministrit Saimir Tahiri në këto përgjime, e ka kthyer politikën shqiptare në ditët e saj më të nxehta. Sipas burimeve diplomatike, mesditën e sotme ambasadori i SHBA-së në Tiranë ka shkuar në nje takim urgjent në ambasadën italiane, në Tiranë me ambasadorin Alberto Cutillo sipas syri.net.
Çfarë ndodhi sot që u kërkua ky takim me kaq urgjencë? Cilat janë përgjigjet që do të marrë ambasadori Lu, për gjithë situatën e krijuar, duke filluar nga përgjimet e dosjes Habilaj, përfshirjen e ish-ministrit Saimir Tahiri në këto përgjime?
Në fillim të muajt, ambasadori Donald Lu foli hapur për kriminalizimin e shoqërisë shqiptare, ku dha informacione për grupet kriminale në Shqipëri, duke numëruar 20 prej tyre, ndërsa shtoi se në Shqipëri veprojnë 4 klane kryesore.
Dy javë pas kësaj deklaratë policia italiane arreston vëllezërit Habilaj për trafik droge dhe në media sipas dosjes së përpiluar nga prokuroria italiane thuhet se është i përfshirë dhe ish-ministri i Brendshëm, Sajmir Tahiri.
Një javë më parë u publikua dosja e plotë e hetimit ndaj Moisi Habilaj, ku është i implikuar edhe ish-ministri i Brendshëm, Saimir Tahiri i cili përmendet në dosjen e Gjykatës së Katanias, e cila përmban më shumë se 400 faqe dhe që vulosi fatin e Moisi Habilajt. Habilaj e përmend Tahirin si kushëririn dhe mbështetësin e trafikut të drogës në këmbim të parave për fushatë.
Grupi i trafikantëve të arrestuar nga policia italiane për 3.5 tonë hashash ishte vënë prej kohësh nën përgjim. Moisi Habilaj, bashkëpunëtorët e tij shqiptarë dhe italianë kanë tashmë një dosje prej 416 faqesh me fakte dhe biseda të përgjuara, ku ata përmendin emra dhe para dhe që është baza e vendimit të Gjykatës së Katanias për burgosjen e tyre.
Pjesë e kësaj dosje është një përgjim i datës 16 dhjetor të vitit 2013 i një bisede mes Moisi Habilajt dhe Sabaudin Çelajt, kur ata sipas vlerësimit të prokurorëve dhe gjykatësve italianë, përmendin ministrin e Brendshëm të asaj kohe, Saimir Tahiri.
Hetuesit italianë bëjnë një përmbledhje të kësaj bisede:
“Të dy flasin për një person me pushtet me emrin “Saimir Tahiri” (deputet i Shqipërisë) njeri i politikës. Moisiu thotë: Çfarë ka më shumë se ne ai? Por Sabi (Sabaudini) i përgjigjet duke i thënë që Saimiri ka vetëm emrin (në kuptimin e famës, pozitës), por nuk beson që ka më shumë para se ata. Moisiu bën llogaritë sipas të cilave Saimiri në një muaj ka bërë minimumi 5 milionë euro. Sabi i thotë që të gjitha ato para ai i harxhon në fushatën elektorale. Por Moisiu i thotë që atij nuk i mjaftojnë as 20 milionë në një fushatë elektorale”, thonë hetuesit italianë.
Në përgjimin e datës 2 mars të vitit 2014 mes Habilajt dhe Çelajt përmendet automjeti me targë AA003GB, me të cilin të dy personat kanë udhëtuar drejt Siçilisë. Kjo makinë ishte në emër të Saimir Tahirit.
