Deputetja Albana Vokshi ka marrë pjesë në Forumin e Grave të Partive Popullore, që u mbajt këto dy ditë nën kujdesin e Presidentes, Doris Pack.
Kryetarja e Lidhjes Demokratike të Gruas së Shqipërisë, Albana Vokshi, raportoi rreth zhvillimeve më të fundit politike në Shqipëri dhe shprehu vendosmërinë e Partisë Demokratike për të garantuar zgjedhje të lira dhe të ndershme.
Gjithashtu, Vokshi informoi koleget e saj të Partive Popullore Europiane për “fushatën e keqinformimit të partnerëve të huaj nga qeveria Rama, përmes propagandës dhe lobimeve të financuara me para të pista.”
Doris Pack e konsideroi si një “çmenduri” atë që po ndodh në Shqipëri, ndërsa qortoi heshtjen e diplomatëve të huaj, lidhur me ngërçin politik.
“Ajo çfarë po ndodh në Shqipëri aktualisht është një çmenduri. Vendi i mbushur i gjithi me drogë, një rrezik jo vetëm për kthimin e Shqipërisë në vend kryesor për prodhim dhe eksport droge, por për mjedisin ku rriten fëmijët shqiptarë. Në Parlament dhe administratë mbahen me dhjetra persona me rekorde kriminale se kanë paguar për pushtetin e Ramës, ndërkohë profesionistët hiqen nga puna për bindje politike”, deklaroi Pack.
Gjithashtu, Pack përshëndeti kërkesën për zgjidhjen e situatës me ndihmën e Partisë Popullore Europiane dhe shprehu besimin e plotë se zv/presidenti i Parlamentit Europian, McAllister, është ndërmjetësi i duhur për zgjidhjen e krizës në Shqipëri.
