Peshëngritësi Erkand Qerimaj, pasi mori medaljen e bronzit në Botëror të Peshëngritjes, tha se pret një shpërblim të qeverisë për arritjen e tij.
Qerimaj komentoi edhe skandalin e Romela Begajt, e cila rezultoi pozitive në testin e dopingut.
Në një intervistë për ‘News24’ peshëngritësi shkodran theksoi se është shumë i gëzuar për medaljen, ndërsa dha mesazhin e qartë se skandali që ndodhi nuk duhet të ndikojë tek sportistit e rinj.
Qerimaj u ndal edhe tek ‘trofeu’ që ai pret nga qeveria, ndërsa kujtoi rastin e 15 viteve më parë të peshëngritësit Ilir Suli, i cili pas medaljes së bronzit që mori në Botëror, u shpërblye nga qeveria Nano me 100 milion lekë.
Pjesë nga intervista e Qerimajt:
Si ndiheni për këtë fitoren e arritur? Siguruat medaljen e bronxit në Botërorin e Peshëngritjes
Jam shumë i emocionuar, shumë i gëzuar. Është një nder i madh të marrë medaljen. Jam i gëzuar për këtë rezultat. Unë kam marrë 4 herë medalje, por nga Botërori është medalja e parë.
A përfitoni financiarisht diçka nga kjo arritje?
Do shohim se ça do na ofrojmë këta të ministrisë. Se di realisht. Pasi praktikat e mëparshme kanë qenë në varësi të drejtueseve. Se di me siguri nëse do marrë shpërblim apo jo. Kur Ilir Suli mori medaljen dhe u nderua me çmimin 100 milionë lekë nga ish-kryeministri Fatos Nano. Kjo është në dëshirën e vlerësuesve.
Sa ndikon skandali i dopingut?
Situata është shumë e ngarkuar. Për sportistët dhe trajnerët nuk është e mirë situata. Goditja e fundit që u dha ishte shumë e rëndë për sportistët. Por jeta vazhdon. Nuk duhet të ndikohemi nga kjo situatë, besoj do kalojë. Duhet të kthehemi me medalje. Sportistët e rinj nuk duhet të demoralizohen, pasi duhet të vazhdojnë para.
A rrezikon vendi të mos përfaqësohet në këtë event?
Nuk besoj se ka rrezikim për të mos u përfaqësuar. Por ishte dëm i madh. Evropiani nuk është vendosur akoma se ku do mbahet. Dikush duhet të mbajë përgjegjësi për këtë çështje. Sportistja (Romela) u dërgua në Greqi për stërvitje, ndaj dikush duhet të marrë përgjegjësi.
Keni një apel për të bërë?
Uroj që të marr një shpërblim nga qeveria se solla medalje. Ne jemi vend shumë i vogël dhe këto rezultate janë të radha. Rezultati i tillë ishte para 15 vitesh dhe sot vjen kjo medalje.
