Opinioni publik ka shtuar edhe më shumë dozën e pritshmërive të rezutateve të Vetting-ut, dhe luftës kundër krimit të organizuar. Teksa ambasadori Lu ende vijon të mbështesë arritjet pozitive që do të sjellë reforma, përmes “izolimit” të politikanëve të korruptuar, nga ana tjetër duket se ka ende shumë punë për tu bërë.
Një ndër deklaratat e tij më të bujshme është dhe ajo, sipas së cilës ka ardhur koha të kapim “peshkun e madh”. Krejt natyrshëm të lind pyetja; vallë a është kapur peshku i madh?! Kjo çështje nuk është lënë me kaq, madje ambasadori Lu, në mënyrë figurative i ka dhënë vulën përfundimtare.
Intervistën e fundit në Shqipëri, ambasadori Donald Lu ka zgjedhur ta japë për gazetarin Sokol Balla. Ai ka zgjedhur të japë një simbol të fortë, duke zgjedhur të veshë një palë çorape me peshq.
Kjo zgjedhje nuk ka qënë rastësore, duke përçuar mesazhin se qeveria, policia, prokuroria, janë serioze në luftën kundër krimit të organizuar.
“Vesha çorapet e mia të posaçme, që t’i shihni. Është me rëndësi për popullin shqiptar që të dijë se qeveria e tyre, policia e tyre, prokuroria e tyre janë vërtet serioze për luftën kundër krimit të organizuar.
Pata një bisedë shumë të mirë me drejtorin e përgjithshëm të policisë, Ardi Veliu, javën e shkuar. Kanë punuar shumë fort së bashku me prokurorët për të ngritur Task-Forcën për forcën e ligjit.
Po punojnë sot shumë ngushtë me ligjzbatues amerikanë, gjermanë, italianë, francezë, grekë, spanjollë, dhe kjo ka çuar në suksese reale. Kemi parë arrestimin e Arbër Çekaj, arrestimin e Met Kananit; janë dy trafikantë droge të arrestuar në Spanjë.
Vetëm këtë javë pamë trafikantë të arrestuar në Itali dhe Gjermani. Kjo është e rëndësishme, por duhet të jetë vetëm fillimi. Ka shumë më tepër punë për të bërë dhe më vjen pak keq se nuk do të kem mundësi të jem këtu, për t’i parë gjithë rezultatet e asaj pune”, tha Donald Lu.
