Ajo që u quajt nga ministri i Jashtëm “klithma gjinkallash të dëshpëruar”, duket se është një “alarm” aspak i rremë për shqiptarët.
ABC News ka siguruar një dokument, ku disa deputetë holandezë i kanë kërkuar qeverisë holandeze që të marrë një vendim për propozimin në fjalë.
Shkresa i drejtohet ministrisë së Jashtme dhe asaj të Sigurisë dhe Drejtësisë dhe përbëhet nga një listë prej 12 pyetjesh, të cilat përdoren si një mekanizëm për të hapur një debat në Parlament.
E thënë ndryshe, këta deputetë kanë marrë hapin e parë për të nisur diskutimin për propozimin e rikthimit të vizave për shtetasit shqiptarë në Evropë.
Pyetjet e para janë për rritjen e elementit kriminal në Holandë dhe pasohet nga shpjegimi që Holanda mund të kërkojë për një pezullim të lëvizjes së lirë n.q.s rrezikohet rendi publik apo siguria kombëtare.
Pyetjet vazhdojnë sipas disa raporteve të përpiluara nga policia holandeze, britanike, franceze dhe italiane, prej të cilave bëhet e qartë që krimi i organizuar shqiptar përbën rrezik serioz për Holandën, por edhe për shtete të tjera.
Në pyetjen e parafundit kërkohet që qeveria holandeze të shpjegojë se si Shqipëria është bërë vend kandidat në BE, pavarësisht se nuk i përmbush kushtet për të marrë një status të tillë.
Gjithashtu, dje u zbardh një pjesë e raportit të qeverisë holandeze, sipas të cilit elementet kriminalë shqiptarë janë fuqizuar se tepërmi në këtë vend. Sipas raportit, organet ligjzbatuese holandeze kanë parë të udhës pezullimin e lëvizjes së lirë të shqiptarëve drejt Holandës dhe për pasojë edhe rikthimin e plotë të vizave me këtë vend.
“Kriminelët shqiptarë shikohen si një kërcënim serioz për shoqërinë holandeze pasi janë të implikuar në trafikimin dhe shitjen e kokainës dhe kanabisit, trafikimin njerëzor dhe pastrim parash. Roli i kriminelëve shqiptarë po forcohet, dhe ka marrë një rol prominent në Holandë. Ka një mbiprezencë të madhe te shqiptarët në trafikun e drogës dhe pastrimin e parave. Një tjetër problem janë klandestinët shqiptarë, të cilët përdorin portet holandeze për të ikur ilegalisht në Angli”, shkruhet në raport.
Ndërkohë, ambasadorja e Holandës Dewi van de Weerd pranoi dje se raporti i zbuluar pjesërisht në mediat holandeze ekziston dhe po studiohet nga Ministria e Drejtësisë dhe Sigurisë, por ende nuk është paraqitur zyrtarisht:
“Ne jemi të vetëdijshëm për artikujt e shtypit holandez në lidhje me një raport konfidencial të policisë holandeze në lidhje me shkallën e krimit të organizuar nga persona me origjinë shqiptare në Holandë. Raporti aktualisht është duke u studiuar nga Ministria Holandeze e Sigurisë dhe Drejtësisë, por ende nuk është paraqitur zyrtarisht në ministri.”
Pavarësisht shqetësimit të ngritur nga Holanda dhe propozimit të saj për rivendosjen e vizave me Shqipërinë, do të duhet një vendim i Parlamentit Evropian për të arritur në një situatë të tillë.
