Deputetja e PDIU-së, Mesila Doda, pas rrëzimit të kandidaturës së Shpëtim Idrizit si anëtar i komisionit ad-hoc për Vettingun, ka lëshuar një mori akuzash të rënda në drejtim të politikanëve të pranishëm në Parlament.
“Sot shqiptarët kanë parë një tjetër fytyrë të politikës që nuk e do drejtësinë. Kryetari i Kuvendit të Shqipërisë solli kërkesën sipas të cilës grupet parlamentare duhet të sjellin propozimet e tyre. Sot kemi gjysmën e Parlamentit që mungon, unë mendoj që kësaj gjysme nuk i është shtrirë akoma dora e bashkëpunimit. Sot treguat me aktin tuaj se nuk i merrni parasysh jo vetëm kërkesat e opozitës, por edhe të aleatëve tuaj”, tha Mesila Doda.
Kandidatura e Shpëtim Idrizit mori 23 vota pro, 7 kundër dhe 50 abstenim, ndërsa për këtë komision u votuan deputetët Ulsi Manja, Vasilika Hysit nga PS dhe Luan Rama nga LSI.
