Pavarësisht kërkesës për liri, Gjykata e Apelit ka vendosur të lërë në fuqi masën e sigurisë “arrest me burg” për Rexhep Rrajën.
Rraja nuk mori pjesë në seancë. Ai u përfaqësua nga avokati i tij. Nga jashtë gjykatës, Xhisiela Maloku ka bërë avokatin e tij mbrojtës, pavarësisht se ishte denoncimi i saj për përndjekje që e la pas hekurave.
Për gazetarët, Xhisiela tha se kishte shkuar në gjykatë për ta mbështetur ish-të dashurin, pasi ishte i pafajshëm.
Ajo ka konirmuar ndër të tjera se s’ka pasur asnjë presion nga të tjerët, dhe se është e bindur se nuk do të ketë probleme me Rexhepin.
Xhisiela kërcënon dhe median: “Më rrini larg. Një media që do merret me jetën time, do ta çoj në prokurori”.
25-vjeçaja tha se nuk mundi të ishte e pranishme në seancë, por u qëndron besnike fjalëve që ka deklaruar më herët.
“Unë këtu kërkoja lirimin, nuk arrita të jem në gjykatë për ta mbështetur. Në seancën tjetër do të jem. Ato që kam thënë janë të vërtetat e vetme. Problemet kanë ardhur për arsye që i kam sqaruar, xhelozia. Unë i jap përgjegjësi shtetit, jo medias. Ju kërkoj të më lini larg, se keni filluar të merreni me detaje”, tha ajo.
