Në kuadër të vizitës zyrtare në Mal të Zi, Ministri i Punëve të Jashtme të Shqipërisë, Ditmir Bushati, ka nënshkruar me homologun e tij malazias, Srgjan Darmanoviç, një marrëveshje bashkëpunimi në fushën e shëndetësisë. Bushati, përmes postimit të tij në rrjetin social fb, e vlerësoi të suksesshme vizitën me Kryeministrin Edi Rama në Podgoricë.
“Mbledhja e përbashkët e dy qeverive tona, në Shkodër, në Tetor të këtij viti, do na mundësojë të bashkërendojmë më mirë vendimet tona dhe politikat zhvillimore ndërkufitare. Në qëndër të vëmendjes tonë, janë të drejtat e shqiptarëve në Malin e Zi. Ndaj, biseda në Ulqin me përfaqësuesit e tyre politikë na dha shenja optimizmi për përmbushjen e të drejtave të tyre dhe ecurinë e projekteve të ndërsjellta në zonat ndërkufitare”, theksoi Ministri Bushati.
Kujtojmë se institucionet shëndetësore në Ulqin, gjatë mandatit të qeverisë së kaluar ishin nën presion të madh, duke propozuar rajonalizimin e shtëpisë së shëndetit e me pas edhe mbylljen e maternitetit në Ulqin. Por, kjo fatmirësisht nuk ka ndodhur, për shkak të reagimeve të ashpra të strukturave politike, në radhë të parë të atyre shqiptare.
