Skuadra e Kamzës siguroi mbijetesën në Superiore në ndeshjen e fundit pasi mposhti Partizanin me rezultatin e ngushtë 1-0 në transfertë. Por vetëm një ditë pas ndeshjes në kampin kamzali ka ndodhur çudia, drejtuesit kanë shkarkuar me një status në Facebook trajnerin që i mori në një moment të vështirë dhe i riktheu tek fitorja, aq më shumë tek arritja e objektivit duke e shkarkuar Ahmatajn.
Teksa i gjithë klubi po festonte mbijetesën, Ahmataj udhëtoi drejt Korçës bashkë me familjen e tij, për ditëlindjen e 39-të. Gjithçka për rastësi në mbrëmjen ku Skënderbeu po festonte titullin e tetë kampion.
Edhe këtu gjithçka normale, ashtu sikurse edhe ftesa e drejtuesve dhe lojtarëve të klubit korçar që Ahmataj t’i bashkohej për disa momente festës së tyre. Si një ish-lojtar me emër në Shqipëri, por edhe mik i një pjese të konsiderueshme të stafit dhe lojtarëve të korçarëve, Ahmataj nuk mund të refuzonte.
I takoi fituesit dhe i uroi për arritjen. Megjithatë, ky episod nuk është parë me sy të mirë nga drejtuesit e Kamzës. Me kujtimin e freskët të luftës për mbijetesë, e ndoshta edhe me mëri personale me skuadrat e tjera, prezenca e Ahmatajt jo vetëm që nuk u pëlqye, por solli edhe prishjen e bashkëpunimit me trajnerin. Një vendim i papritur, me futbollin që konfirmon se bashkëjeton me çuditë që të ofron përditshmëria në Shqipëri.
