Nesër është Dita Ndërkombëtare pa Makina, e cila synon sensibilizimin e qytetarëve, të cilët duhet të lënë në shtëpi makinën e tyre, si një përpjekje për të kontribuar për mbrojtjen e mjedisit.
Si çdo vit, në këtë ditë do të ndalohet qarkullimi rrugor në disa akse kryesore në kryeqytet.
Gjithashtu, Bashkia do të zhvillojë disa aktivitete në 3 zona kryesore: përgjatë rrugës ‘’Kont Urani’’, segmenti nga rruga e “Durrësit’’ deri tek rruga ‘’Mihal Duri’’, do të zhvillohet një minipanair libri me botime mjedisore dhe jo vetëm.
Ndërkohë që rruga “Luigj Gurakuqi” deri tek sheshi “Avni Rustemi’’, do të shërbejë për promovimin e mjeteve ekologjike të transportit. Gjithashtu edhe disa rrugë në zonën e Ish-Bllokut do të kthehen në hapësira shërbimi për njerëzit.
Rrugët ku do ndalohet qarkullimi i automjeteve ditën e premte janë:
- “Dëshmorët e Kombit”, segmenti përpara Pallatit të Koncerteve dhe Presidencës
- Rruga “Kont Urani” (te klubi “Heminguej”), do të bllokohet hyrja nga rruga e “Durrësit” deri në kryqëzim me rrugën “Mihal Duri”
- Rruga “Brigada VIII” deri ne kryqëzim me rrugën “Vaso Pasha”
- Rruga “Pjetër Bogdani” nga kryqëzimi me rrugën “Vaso Pasha” deri në kryqëzim me rrugën “Ibrahim Rugova”
