Presidenti Nishani ka nderuar me “Dekoratën e Artë të Shqiponjës” Liri Belishovën, Llazar Fundon, Edip Ohrin dhe Hamit Keçin për kontributin në luftë dhe qëndresën dinjitoze ndaj regjimit komunist.
Nderimi vjen në kuadër të Ditës së Evropës, që përkujton fitoren ndaj nazifashizmit.
Gjithashtu, Nishani përcolli edhe një mesazh që lidhet me rrezikun që luftërat të shfrytëzohen për kapital politik në kurriz të së vërtetës.
“Sot duhet të jemi krenarë për përpjekjet e mëdha që u bënë në atë kohë dhe të përkulemi me respekt ndaj sakrificës së gjithë atyre djemve dhe vajzave që ishin të gatshëm dhe u sakrifikuan në përballje me pushtuesin.
Ne kemi sot një mision të rëndësishëm që këtë histori të mos e lëmë të manipulohet për qëllime individuale apo grupe individësh, qoftë kjo e pushteteve apo ideologjive politike. Kemi një mision që të nderojmë përpjekjen, të ruajmë kujtesën e sakrificës dhe mbrojmë fortë vizionin dhe objektivat e atyre që vunë gjithçka në përballje me pushtuesin”, tha Presidenti gjatë fjalës së tij.
Figurat e dekoruara nga Nishani janë pjesëmarrës në luftën nazifashiste, por u përndoqën më pas si kundërshtarë të regjimit.
