Gjatë merkato së verës Interi ishte shumë i interesuar për të afruar në ekip Luka Modric dhe vazhdon të shfaqë të njëjtin interes edhe pse akoma nuk ka bërë një ofertë zyrtare. Ishin drejtuesit e Real Madridit që bllokuan këtë transferim në muajin gusht, pasi presidenti Perez nuk donte që të humbiste edhe atë pas Zidane dhe Ronaldos.
Ndërsa tashmë madrilenët janë duke menduar një strategji të re për të kënaqur Interin duke i dhënë Modric, por duke marrë në Madrid një goleador si Icardi. Drejtuesit e klubit mesa duket janë duke planifikuar sulmin e tyre për të përfituar shërbimet e argjentinasit Icardi dhe rol kyç në realizimin e negociatave ka kroati Modric.
Modric plus 40 milionë euro, kjo parashtrohet si oferta e Realit që mund të përmbushë prentedimet e larta të italianëve për asin e organikës së tyre. Gjithsesi, deri verën e ardhshme mbetet për t’u parë se çfarë do të ndodhë me numrin 10 të Lopeteguit. Vetë kroati 33-vjeçar është mëse i gatshëm të ndryshojë ambient sezonin e ardhshëm.
Ai mendon që është momenti i duhur për të kërkuar një aventurë të fundit madhore, të cilën mesa duket e projekton në Serinë A italiane. Kështu që opinioni i gjerë në Madrid sheh tek ai urën lidhëse nëpërmjet të cilës klubi mbretëror do të arrijë shërbimet e një goleadori të rëndësishëm të momentit si Mauro Icardi.
