Diego Costa padyshim është një ndër sulmuesit më të fortë në botë dhe këtë e ka treguar në çdo ekip që ka luajtur. Gjatë periudhës që ai ishte tek Chelsea nuk ka pasur raporte aspak të mira me trajnerin Antonio Conte dhe kjo filloi pasi kishin fituar titullin e Premier League. Në periudhën në të cilën tekniku italian ishte në Londër, nga 2016 në 2018, sulmuesi tani tek Atletico Madrid ka kontribuuar në fitoren e Premier me 20 gola, përpara se të përfundonte jashtë skuadrës në sezonin që pasoi.
“Një periudhë e keqe, por jo për fajin tim, edhe pse njerëzit flisnin shumë gjëra – ka deklaruar braziliani i natyralizuar spanjoll për gazetën Marca -. Koha tregon gjithçka, shikoni ku është Conte tani, shikoni si përfundoi”. Costa nuk ndalet në mërinë e tij për teknikun italian, duke treguar detaje të atyre kohëve të komplikuara: “Historia e tij me Chelsea përfundoi sepse ashtu i bëri gjërat ai, pasi bëmë gjithçka për të fituar kampionatin, më dërgoi një mesazh për të më thënë se nuk kishte më nevojë për mua, duke më dërguar të stërvitesha me ekipin e dytë”.
Për ti vënë vulën, Diego Costa bën krahasimin me trajnerin aktual të Atletico, Diego Simeone: “Ai është ndryshe nga Conte, është një trajner direkt. Dëshiroja vetëm të kthehesha tek Atletico, përndryshe do të kthehesha në Brazil me familjen time”.
