Futbolli në Belgjikë është përfshirë në një kaos të vërtetë, pasi një lumë akuzash dhe arrestimesh janë bërë për menaxherë e drejtues klubesh të cilët akuzohen për marrëveshje të dyshimta me qëllim paracaktimin e ndeshjeve, evazion fiskal apo edhe falsifikime dokumentesh.
Të shumtë janë personat në hetim për këtë çështje, por nuk ka munguar edhe emri i trajnerit të njohur shqiptar, Besnik Hasit. Menaxheri i klubit të Kortrijk, Matias Leterm, ka treguar prapaskenat e kësaj ngjarje, duke zbuluar se ai ishte kontaktuar vitin e kaluar nga një gazetar, i cili i kishte kërkuar në mënyrë direkte që të punësonte Besnik Hasin si trajner. Hasi ishte një prej trajnerëve që menaxhohej nga Dejan Veijlkoviç, menaxheri serb i cili shihet si personi në epiqendrën e hetimeve në Belgjikë.
Gazetari në fjalë ishte Stefan Kejgnaert, shefi i redaksisë së futbollit në gazetën “Het Laatste Nieuws”, një nga më të mëdhatë në Belgjikë. Edhe ai kishte lidhje me Veijlkoviç dhe Hasin.
“Ai insistoi shumë edhe te presidenti i klubit, kërkoi që të vendosnim Hasin, por në zgjodhëm Anastasiu. Ajo që ndodhi më pas, është absurde dhe e pabesueshme”, tregon Leterm. “Një gazetar nuk duhet të ndikojë për një menaxher futbollistësh apo për një trajner. Nuk është etike, por ai nuk u ndal aty. Kur u vendos Anastasiu, gazeta e tij shkroi se Kortrijk duhej të paguante disa dhjetëra mijëra euro më shumë për të marrë një trajner më të mirë. Kjo nuk ishte aspak korrekte. Ai u tall me ne. Kjo është ajo që më ka zemëruar më shumë”, tregoi drejtuesi i klubit belg për ngjarjen me gazetarin i cili për momentin është lënë pezulluar nga gazeta e tij.
Sipas mediave belge, të gjithë personat e përfshirë në këto hetim, mes të cilëve edhe drejtuesit e klubeve më të njohura, do të merren në pyetje nga drejtësia belge dhe autoritetet e federatës. Nuk është aspak çudi që një gjë e tillë të ndodhë edhe me Hasin i cili aktualisht po drejton në Arabinë Saudite klubi Al Raed.
