Stërvitja e ditës së sotme tek skuadra e Tomorrit ishte një kaos. Para se futbollistët të fillonin ushtrimet e udhëzuara nga trajneri Bledar Devolli ka pasur një përleshje. Një debat që ka përfunduar duke përdorur grushtet mes lojtarit beratas, Lisjan Hadaj, dhe trajnerit të Tomorit.
Mësohet se krisjet kanë nisur që para ndeshjes me Lushnjën, kur lojtari i ka kërkuar llogari trajnerit pse nuk e ka aktivizuar. Kjo nuk i ka pëlqyer Devollit, i cili ka vendosur pezullimin e lojtarit. Por, mesa duket ky i fundit nuk e ka përtypur këtë situatë dhe ka goditur trajnerin në stërvitje, diçka që është parë edhe nga tifozët beratas, zbuloi Panorama.
Një situatë skandaloze, teksa është dashur ndërhyrja e lojtarëve të tjerë, në mënyrë që përplasja të mos vijonte. Nuk ka vonuar edhe reagimi i klubit beratas për këtë ngjarje të shëmtuar dhe antisportive.
Drejtuesit kanë pezulluar pa afat futbollistin Hadaj, për këtë veprim, ndërsa i kanë dhënë besim maksimal trajnerit Devolli, për të vazhduar punën me ekipin. Ja dhe njoftimi i klubit beratas.
Menjëherë pas incidentit të ndodhur gjatë seancës së sotme stërvitore klubi ka vendosur:
Pezullim pa afat për futbollistin Lisjan Hadaj. Ndërkohë pas situatës së krijuar, duam ti japim besimin maksimal teknikut Bledar Devollit dhe bashkë me stafin e tij dhe futbollistët të vazhdoj punën dhe rikthimin tek fitorja.
