Ardi Veliu duket se është i besuari i ministrit të Brendshëm, Fatmir Xhafaj, teksa ky i fundit propozoi emrin e tij si Drejtor të Përgjithshëm të Policisë së Shtetit.
Ky propozim nuk është vonuar as nga kryeministri, i cili e ka firmosur menjëherë emërimin e Veliut, i cili zuri vendin e ish-eprorit të tij, Haki Çakos.
Por, cilat janë kriteret e emërimit të Drejtorit të Policisë së Shtetit?
Duket se më shumë se përmbushja e plotë e kritereve, kemi të bëjmë me një dëshirë të ministrit për ngritjen në detyrë të Veliut, teksa ky i fundit ka një mangësi nëse u referohemi kritereve të parashikuara në Ligjin për Policinë e Shtetit.
Në kriteret që duhet të përmbushen për të qenë Drejtor i Përgjithshëm, thuhet:
- Këshilli i Ministrave emëron Drejtor të Policisë së Shtetit, me propozim të ministrit përgjegjës, një nga punonjësit e policisë që mban gradën “Drejtues i lartë” ose “Drejtues i parë”.
- Përveç kriterit të gradës, kandidati i propozuar për Drejtor të Policisë së Shtetit duhet të plotësojë kriteret si vijon:
a) të ketë vetëm shtetësinë shqiptare;
b) të ketë të paktën 15 vjet përvojë në polici, nga të cilat të paktën 10 vjet në pozita të larta drejtuese në strukturat e Policisë së Shtetit;
c) të ketë integritet dhe figurë të pastër morale;
ç) të mos ketë qenë i dënuar për vepër penale, me vendim të formës së prerë;
d) të mos ketë masa për shkelje të rënda disiplinore të policisë brenda 3 viteve të fundit;
dh) të mos ketë konflikt interesi në ushtrimin e detyrës;
- Drejtori i Policisë së Shtetit qëndron në detyrë për një periudhë prej 5 vjetësh me të drejtë riemërimi edhe për një mandat tjetër.
Është pikërisht kriteri numër 2 pika b i Ligjit, ku thuhet që kandidati duhet “të ketë të paktën 15 vjet përvojë në polici, nga të cilat të paktën 10 vjet në pozita të larta drejtuese në strukturat e Policisë së Shtetit”.
Një kriter që Ardi Veliu nuk e përmbush, ose më saktë pjesën e dytë të tij, e cila shprehet se kandidati duhet të ketë 10 vjet eksperiencë në pozita të larta drejtuese në Policinë e Shtetit, gjë që i mungon Veliut siç duket edhe në CV-në e mëposhtme.
Veliu mori pak ditë më parë gradën “Drejtues i Parë”, ku doli i pari në konkursin në Akademinë e Policisë, duke përmbushur një tjetër kusht vetëm pak ditë para emërimit të tij në krye të Policisë së Shtetit.
CV e Ardi Veliut:
Komandant i “Postës së Policisë”, Memaliaj, Tepelenë (1998-1999)
Shefi i Policisë së Rendit, Vlorë (1993-2002)
Shefi i sektorit të “Policisë me Uniformë”, Drejtoria e Policisë, Vlorë (2002-2004)
Shefi i sektorit të Rendit, Drejtoria e Policisë, Vlorë (2004-2006)
Shefi i komisariatit të Policisë, Durrës (2013-2014)
Zëvendësdrejtor për Sigurinë, Drejtoria e Policisë, Tiranë (2014-2015)
Drejtor i Kolegjit te Policisë (Shkolla Bazë e Policisë) 2015 -2016
Drejtor i Policisë Rrugore ne Drejtorinë e Policisë së Shtetit 29.07.2016 – 27.04.2017
Nga data 28.04.2017 Drejtor i Drejtorisë Vendore të Policisë Tirane.
